Fjölnir í Grafarvogi er að spila í fyrsta skipti í efstu deild á þessu leiktímabili. Nýliðarnir byrjuðu Íslandsmótið afar vel í sínum fyrsta leik sem var á útivelli gegn Þrótturum og unnu sannfærandi sigur 0-3.
Annað kvöld tekur liðið hins vegar á móti Vesturbæjarstórveldinu KR á heimavelli sínum í Grafarvoginum en áhorfendaaðstaðan hjá Fjölnismönnum var ekki lögleg samkvæmt því sem tíðkast um lið sem spila í Landsbankadeildinni.
Nú eru menn hins vegar að leggja lokahönd á betri aðstöðu fyrir áhorfendur og mun völlurinn taka um 500 manns í sæti til að byrja með.
Þegar okkur hjá Fótbolta.net bar að garði í Grafarvoginum um hádegisbilið í dag voru menn í óðaönn að gera allt reiðubúið fyrir áhorfendur í fyrsta heimaleik Fjölnis á þessu tímabili.
,,Völlurinn verður tilbúinn á morgun," sagði Hermann Hreinsson starfsmaður Fjölnis í samtali við Fótbolta.net í dag. ,,Síðan kemur 800 manna stúka hinum megin, þar sem félagsheimilið er í framtíðinni."
Bílastæðamál við Fjölnisvöll gætu orðið vandamál en öll bílastæði voru nýtt í gær þegar aðeins á annað hundrað áhorfendur sáu leik kvennaliðs Fjölnis gegn Fylki í Landsbankadeild kvenna.
,,Á morgun ætlum við að vera smá uppákomu fyrir leikinn við Foldaskóla. Við ætlum að reyna að dreifa álaginu svo fólk komi þangað og fari svo í skrúðgöngu yfir," sagði hann aðspurður um bílastæðavandmálið.
Hann vildi svo hvetja Grafarvogsbúa til að koma gangandi á völlinn og aðra til að samnýta bílana og sýna tillittsemi því þetta væri fyrsti heimaleikur liðsins í efstu deild.
Athugasemdir